Manchester United undirbýr sig fyrir annasaman sumarglugga þar sem áherslan verður fyrst og fremst á leikmannakaup. Félagið stefnir á endurkomu í Meistaradeildina eftir góðan viðsnúning síðan Michael Carrick tók við liðinu í janúar.
Miðjan verður forgangsmál, enda er Casemiro á leið út og óvissa um framtíð Manuel Ugarte. United gæti því fengið að minnsta kosti tvo nýja miðjumenn, auk þess sem vinstri kantmaður er á óskalistanum.
Á sama tíma þarf að leysa úr samningsmálum lykilmanna. Bruno Fernandes, fyrirliði liðsins, gæti framlengt samning sinn en mun taka ákvörðun eftir heimsmeistaramótið. Kobbie Mainoo er hins vegar sagður nálægt því að skrifa undir nýjan samning.
Óvissa ríkir um framtíð Luke Shaw, sem hefur glímt við meiðsli en spilað vel á tímabilinu, og Lisandro Martínez sem hefur einnig verið mikið frá vegna meiðsla.
Stjórnendur félagsins standa því frammi fyrir erfiðum ákvörðunum þar sem meta þarf bæði frammistöðu og líkamlegt ástand leikmanna áður en langtímasamningar eru boðnir.
