Dómstóll í Frakklandi hefur hafnað skaðabótakröfu Cardiff City vegna andláts Emiliano Sala árið 2019.

Sala, sem var 28 ára gamall, lést ásamt flugmanninum David Ibbotson þegar flugvél þeirra fórst yfir Ermarsundi 21. janúar 2019. Argentínumaðurinn var þá á leið til Cardiff frá Nantes eftir að samið var um 15 milljóna punda félagaskipti.

Cardiff fór fram á rúmlega 100 milljónir punda í skaðabætur og taldi félagið sig hafa orðið fyrir miklu fjárhagsjóni, meðal annars þar sem Sala hefði getað hjálpað liðinu að halda sér í ensku úrvalsdeildinni, en liðið féll um vorið.

Dómstóll í Nantes hafnaði hins vegar kröfunni og komst að þeirri niðurstöðu að Nantes bæri ekki ábyrgð á tjóninu. Þá var Cardiff einnig gert að greiða um 400 þúsund pund í málskostnað og bætur til franska félagsins.