Arnar Gunnlaugsson landsliðsþjálfari var ekki hrifinn af viðtali sem Mohamed Salah veitti fréttamönnum eftir jafntefli gegn Leeds um helgina.

Eins og flestir vita setti Salah allt í háaloft með viðtali sem hann fór í eftir enn ein slöku úrslit Liverpool á laugardag. Salah hefur verið bekkjaður af Arne Slot í unfanförnum leikjum. Sakaði hann félagið um að henda sér undir rútuna í viðtalinu og að samband hans við Slot væri ekkert. Þá gaf Salah það í skyn að leikurinn gegn Brighton um næstu helgi gæti verið sá síðasti á Anfield, fái hann að spila hann.

„Hann gat bara ekki hætt. Vanalega segirðu kannski 1-2 línur. Blaðamannafulltrúi Liverpool stendur þarna fyrir aftan hann og er bara: Geturðu hætt að tala? En hann lét bara móðan mása. Hann var ófaglegur í þessu viðtali. Fór um víðan völl. Var þetta útreiknað hjá honum? Ég held að eina leiðin fyrir hann til að komast út úr þessu og ná sáttum við Liverpool sé að biðjast afsökunar,“ sagði Arnar um málið í Sunnudagsmessunni á Sýn Sport.

Það er talið að Salah verði hent út úr hóp fyrir leik Liverpool gegn Inter í Meistaradeildinni annað kvöld, eins og helstu miðlar hafa fjallað um í dag.