Magnús Már Einarsson, þjálfari karlaliðs Aftureldingar, mætti til Helga Fannars Sigurðssonar í nýjasta þætti af Íþróttavikunni hér á 433.is.

Afturelding verður í Lengjudeildinni á ný næsta sumar eftir að hafa fallið úr efstu deild sem nýliði á þessu ári. Þar er tímabilið mun styttra, byrjar seinna og endar fyrr.

„Það þarf að fara að jafna þetta út. Lengjudeildin byrjar seinna og endar fyrr. Við vorum að klára fríið okkar um daginn og þá voru öll liðin í Lengjudeildinni löngu byrjuð að æfa og jafnvel spila æfingaleiki,“ sagði Magnús.

„Þetta skýtur skökku við að geta ekki fjölgað leikjum, hvort sem það væri að fara upp í 14 lið eða taka upp sama fyrirkomulag og í Bestu deildinni. Það eru yngri leikmenn í Lengjudeildinni og skrýtið að ungir leikmenn fái færri leiki.

Ef við viljum sjá framþróun í íslenskum fótbolta verðum við að breyta þessu. Ég held það sjái allir, sama hvaða skoðun þeir hafa á fyrirkomulaginu, að það hefur hjálpað íslenskum fótbolta að fjölga leikjum.“

Nánar í spilaranum.