Sölvi Geir Ottesen, þjálfari Íslandsmeistara Víkings, vandaði fyrrum þjálfara sínum hjá FC Kaupmannahöfn á leikmannaferlinum ekki kveðjurnar í Dagmálum á Morgunblaðinu.

Sölvi Geir lék með FCK frá 2010 til 2013. Hann fékk lítið að spila með liðinu tímbilið 2012-2013 undir stjórn Belgans Ariel Jacobs. Sakaði hann Sölva til að mynda um að haga sér ekki eins og atvinnumanni er sæmandi.

„Ég ætla að vona að enginn leikmaður beri sömu tilfinningar til mín og ég bar til hans,“ segir Sölvi meðal annars um Jacobs.

„Hann ætlaði strax að taka á agaleysi sem hafði verið í gangi innan FCK, menn voru að fara á klúbbana og það var hiti á mönnum. Ég kom samt ekki nálægt því. Mín upplifun var sú að hann vildi jarða þessa stóru pósta innan liðsins og ég var tekinn strax á fyrstu æfingunni hans og jarðaður fyrir eitthvað, ég veit ekki hvað, ég og aðalframherji liðsins.

Eftir það var samband okkar skrítið og ég gerði líka mistök. Ég tók þessu ekki vel, fór í einhvern fýluleik og náði ekki að fela mínar tilfinningar nægilega vel. Ég tæklaði þetta þannig séð illa en að segja að ég hafi verið ófagmannlegur, það eru ummæli sem voru tekin út úr rassgatinu á honum því ég mætti á hverja einustu æfingu af 100 prósent krafti og staðráðinn í að vinna mér inn sæti í byrjunarliðinu.“