Anton Ingi Rúnarsson hefur verið ráðinn þjálfari kvennaliðs Fram. Hann tekur við af Óskari Smára Haraldssyni, sem sagði starfi sínu lausu á dögunum.

Anton hefur getið sér gott orð í Grindavík undanfarin ár. Stýrði hann kvennaliðinu í tvö ár og karlaliðinu undir lok síðasta tímabils, auk þess sem hann hefur verið yfirþjálfari yngri flokka.

Fram hélt sér uppi sem nýliði í Bestu deildinni í sumar.

Tilkynning Fram
Það er mikið gleðiefni að tilkynna Anton Inga Rúnarsson sem nýjan þjálfara kvennaliðs FRAM.

Anton Ingi er 29 ára og hefur á undanförnum árum aflað sér dýrmætrar reynslu í þjálfun. Hann hefur starfað hjá Grindavík frá árinu 2019, þar sem hann þjálfaði kvennalið félagsins í tvö ár og sinnti jafnframt starfi yfirþjálfara yngri flokka. Þá stýrði hann karlaliði Grindavíkur í síðustu tveimur leikjum tímabilsins þar sem liðið tryggði sætið sitt í Lengjudeildinni.

Anton kemur til FRAM með mikla orku, metnað og ástríðu fyrir uppbyggingu og árangri. Við erum sannfærð um að hann muni leggja sitt af mörkum til að þróa liðið enn frekar og stuðla að áframhaldandi vexti og framförum kvennaknattspyrnunnar hjá FRAM.

Við bjóðum Anton Inga hjartanlega velkominn í FRAM-fjölskylduna og hlökkum til samstarfsins á komandi tímum.

Velkominn Anton – áfram FRAM!