Age Hareide landsliðsþjálfari Íslands segir að barnaleg mistök hafi kostað íslenska liðið í 3-1 tapinu gegn Tyrklandi í kvöld.

Staðan var 1-1 í hálfleik en íslenska liðið gaf eftir því sem leið á leikinn.

„Þetta er léleg sending í fyrsta markinu og við missum boltann fyrir teiginn, það er vond byrjun. Leikmennirnir börðust í fyrri hálfleik og annað gott fast leikatriði sem jafnar leikinn fyrir okkur,“ sagði Hareide um leikinn á Stöð2 Sport.

„Við ræddum í hálfleik að spila meira í fætur, í seinni hálfleik fengum við tækifæri þegar við vorum með þá. Við hefðum getað komist yfir.“

Hareide segir að mistök hafi reynst dýr. „Það eru barnaleg mistök sem kosta okkur, þetta var einn af þeim dögum þar sem þetta gekk ekki upp.“

„Þegar við vorum 2-1 undir þá reyndum við að jafna og áttum góðan kafla þar. Svo fjaraði þetta út og það var þreyta eftir seinni leikinn, við höfum átt í vandræðum með að ná í úrslit í seinni leiknum.“

„Við reyndum að jafna en vorum ekki nógu klókir að finna svæðin á milli lína. Við virkuðum þreyttir undir restina.“