Egil Olsen, fyrrum landsliðsþjálfari Noregs, var bálreiður í gær eftir leik sinna manna við Kasakstan í Þjóðadeildinni.

Kasakstan kom mörgum á óvart og náði stigi gegn Norðmönnum en leiknum lauk með markalausu jafntefli.

Olsen var alls ekki hrifinn af stórstjörnunni Erling Haaland í leiknum en hann hefur verið sjóðandi heitur fyrir Manchester City á tímabilinu.

Olsen lét Haaland heyra það eftir leik sem og Martin Odegaard sem leikur með Arsenal í úrvalsdeildinni á Englandi.

,,Við erum með tvo heimsklassa leikmenn í þessu liði. Því miður, í dag, þá var Erling Haaland langt undir pari. Þetta er ein versta frammistaða sem ég hef séð frá honum,“ sagði Olsen.

,,Odegaard átti sín augnablik en ég hef oft séð hann betri. Það eru engin önnur lið í þessum riðli sem munu tapa stigum gegn Kasakstan.“