Arnar Gunnlaugsson, þjálfari Íslands- og bikarmeistara Víkings, var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni, sem sneri aftur á 433.is eftir sumarfrí fyrir helgi.

Víkingur vann ótrúlegan 3-2 sigur á Val í Bestu deildini á dögunum og voru málefni síðarnefnda liðsins til að mynda til umræðu í þættinum. Arnar segir mikla pressu fylgja því að stýra stórliði eins og Val.

„Valur er bara Manchester United Íslands. Þetta er huge klúbbur með mikla sögu og sigurhefð. Hann er líka með fjármuni, eins og United. Það er karakter í þessum klúbb og þá langar svo að komast aftur á fyrri stall. Það er eiginlega bara kredit á okkur og Blika að hafa haldið þeim aðeins frá okkur hingað til,“ sagði hann.

„Þeir eru með frábært lið, það eru margir af bestu leikmönnum landsins í þessu liði. En svo spilar inn sjálfstraust og hvernig tímabilið er búið að spilast. Það er alveg sama hversu góður þú ert í íþróttum, sjálfstraust skiptir svo gríðarlega miklu máli.“

Arnar Grétarsson var fyrir rúmum mánuði síðann rekinn úr starfi þjálfara Vals og tók Srdjan Tufegdzic, Túfa, við. Það kom Arnari á óvart að nafni hans hafi fengið sparkið.

„Það gerði það. Líka hvernig þetta kom til, ég veit að við erum í brútal leik og að þetta er úrslitabransi, ég er ekki svo barnalegur að halda annað, en þetta var samt brútal miðað við það sem maður heyrði. Maður vill ekkert sjá kollega sinn lenda í slíku.

Við Addi erum búnir að þekkjast lengi í gegnum fótboltann og hann er búinn að vera mjög flottur í sumar gagnvart mér. Hann sendir mér skilaboð fyrir Evrópuleiki og þess háttar. Þó menn rífist aðeins í leikjum er gríðarleg gagnkvæm virðing milli þjálfaranna í deildinni. Ég var bæði hissa og svekktur fyrir hans hönd.“

Umræðan í heild er í spilaranum.

Íþróttavikan er í boði Bola léttöl og Lengjunnar