Ein vinsælasta ef ekki vinsælasta knattspyrnukona heims, Alisha Lehmann, segist ekki vera nein stjarna og lifir alls engu óvenjulegu lífi en hún sjálf segir frá.
Lehmann er af mörgum talin fallegasta knattspyrnukona heims en hún er einnig mjög hæfileikarík í íþróttinni og samdi við Juventus í sumar.
Lehmann flutti til Túrin ásamt kærasta sínum Douglas Luiz en þau léku bæði fyrir Aston Villa á Englandi fyrir það.
Þessi 25 ára gamla kona er með 17 milljónir fylgjenda á Instagram og 11 milljónir á TikTok en hún er engin ofurstjarna að eigin sögn.
,,Ég lifi ekki eins og einhver stjarna, ég er eins og allir aðrir. Eftir æfingar þá segi ég oft við Douglas að þetta sé ósanngjarnt. Við erum að vinna við sama starf en hann fær hundrað þúsund sinnum betur borgað en ég,“ sagði Lehmann.
,,Þegar fólk sér þig á samskiptamiðlum þá hugsar það allt aðra hluti en það er aldrei sannleikurinn. Lífið mitt er mjuög venjulegt, ég fer heim eftir vinnu og elda eins og aðrir.“
,,Það er skemmtilegt þegar fólk heilsar manni úti á götu og spyr hvernig þú hefur það. Ég hef notað samskiptamiðla til að auglýsa enskan fótbolta og nú vil ég gera það á Ítalíu.“
