Það er ekki það algengt að heimsfrægar stjörnur biðji aðrar stjörnur um mynd en það gerðist á dögunum er söngvarinn geðþekki, Robbie Williams, hitti Ruud van Nistelrooy.

Van Nistelrooy er í dag í þjálfarateymi Manchester United en hann er fyrrum leikmaður liðsins og var um tíma einn öflugasti framherji Evrópu.

Williams er mikill aðdáandi Van Nistelrooy en hann sá hetjuna sína óvænt á golfvelli og gat ekki annað en beðið hann um að stöðva í nokkrar sekúndur.

Williams er sjálfur vanur því að fólk komi upp að sér og biðji um mynd en er með litla reynslu af því persónulega – að eigin sögn.

,,Í dag, í eitt augnablik þá varð ég 14 ára á ný. Ég er ekki mikið fyrir það að biðja fólk um myndir,“ sagði Williams.

,,Sá síðasti sem ég bað um mynd var Sue Pollard en þegar ég keyrði framhjá Ruud van Nistelrooy sem var á sínum golfbíl öskraði ég á hann að stoppa.“

,,Ég hljóp til hans eins og antílópa með símann í hönd og var nálægt því að grátbiðja hann um eina mynd.“

,,Á einu augnabliki þá lét ég eins og margir hafa látið í kringum mig, það var eins og eitthvað ónáttúrulegt hefði tekið stjórn. Ég hugsaði með mér að þetta þyrfti að gerast núna. Ég skírði hundinn minn Ruddy í höfuðið á Ruud!“