Maður að nafni Patrick Williams hefur skotið föstum skotum á þýska stórliðið Borussia Dortmund.

Það er vegna hins 19 ára gamla Youssoufa Moukoko sem er að öllum líkindum á förum frá félaginu í sumar.

Williams er umboðsmaður sóknarmannsins sem spilaði aðeins 27 leiki á síðustu leiktíð í öllum keppnum og skoraði sex mörk – mest megnis var hann notaður sem varamaður og kom inn af bekknum.

Útlit er fyrir að Moukoko hafi ákveðið að kveðja Dortmund og er Williams staðráðinn í að Dortmund muni sjá eftir þeirri ákvörðun að standa ekki við eigin loforð.

,,Youssoufa er gríðarlega efnilegur leikmaður en því miður fékk hann ekki að sanna það á síðustu leiktíð,“ sagði Williams.

,,Þeir lofuðu honum gull og grænum skóm en stóðu ekki við þau loforð. Hann hafði aðeins áhuga á að spila leiki og þróa sinn leik – annað en fjölmiðlar fjölluðu um.“

,,Dortmund er að gera risastór mistök með því að missa af Youssoufa, miðað við spilatíma hans þá er vitað að verðimiðinn á honum er ekki hár og Dortmund getur ekki búist við miklu.“

,,Við vildum að hlutirnir myndu ganga öðruvísi fyrir sig en svona er fótboltinn. Youssoufa er búinn að taka ákvörðun og er einbeittur, hann veit hvað hann þarf til að koma ferlinum af stað.“