Srdjan Tufegdzic nýr þjálfari Vals segir það ekki hafa tekið sig langan tíma að taka við starfinu hjá Val þegar það var í boði, Arnar Grétarsson var rekinn í gær og Túfa tók strax við.

Túfa var aðstoðarþjálfari Vals 2020 og 2021 þegar Heimir Guðjónsson var þjálfari liðsins. Hann þekkir því félagið vel og er orðinn mikill Valsari.

„Þetta var mjög stuttur aðdragandi, til að hafa þetta á hreinu. Samtalið byrjaði þannig að þeir vildu skipta um þjálfara og þá var þetta aldrei spurning fyrir mig, að sannfæra menn og fá þessa vinnu,“ segir Túfa í samtali við 433.is en allt viðtalið má heyra hér að neðan.

„Mér líkaði mjög vel, þetta voru tvö frábær ár. Valur sem klúbbur er stór í íslenskum íþróttum, ekki bara í fótbolta. Það er mikill metnaður og mér leið mjög vel hérna, ég var alltaf í sambandi við Finn Frey, Óskar Bjarna og fleiri sem eru að vinna í Vals heimilinu.“

Túfa hefur þjálfað í Svíþjóð í rúm tvö ár en fjölskylda hans var mest á Íslandi og eru þau búsett í hverfinu við Hlíðarenda og börnin hans eru í Val.

„Þeir vita hvernig er að vinna með mér, þessi tvö ár eru ekki langur tími en mér leið eins og Valsari. Við ákváðum að kaupa íbúð í Vals hverfinu og vera með strákana okkar í Val í handbolta og fótbolta. Þetta er frábært.“

Túfa segir Valsmenn stefna á það berjast um titilinn en liðið er átta stigum á eftir toppliði Víkings en á leik til góða og að auki á liðið eftir að mæta Víkingi í tvígang.

„Það breytist aldrei hjá Val, ég þekki metnaðinn vel. Ég þekki stjórnarmenn og marga leikmenn, þetta eru karakterar sem vilja keppa um titla. Það var erfið vika, tvö stór töp gegn Fram og St Mirren og þjálfarabreytingar. Markmið breytist ekki, það eru tólf leikir eftir. Það er komast á völlinn, hitta leikmenn og byrja að þjálfa.“

„Við horfum til lengri tíma, öll einbeiting núna er á næstu æfingu og næsta leik. Klára tímabilið og svo getum við sest niður og unnið í hugmyndum hvernig á að þróa liðið og félagið áfram.“

Viðtalið er í heild hér að ofan.