Arnar Grétarsson fyrrum þjálfari Vals ætlar ekki að ræða ákvörðun stjórnar Vals að segja sér upp í gær. Í samtali við 433.is sagði Arnar að hann myndi ekki ræða málið á næstunni.

Arnari var sagt upp störfum eftir tap gegn St Mirren í Skotlandi í gær, beint eftir leik létu forráðamenn Vals hann vita um uppsögnina.

Börkur Edvardsson formaður Vals vill heldur ekki tjá sig um málið og vísar í yfirlýsingu félagsins frá því í gærkvöldi í samtali við 433.is. „Þetta snýst ekki um einstaka úrslit eða leiki heldur er það einfaldlega mat okkar í stjórn að við séum ekki á réttri leið með liðið og því var þessi ákvörðun tekin. Við þökkum Adda fyrir allt það sem hann hefur gert síðan hann kom til okkar og óskum honum alls hins besta,“ sagði Börkur í yfirlýsingu Vals í gær.

Arnari var tilkynnt um uppsögnin beint eftir tap Vals eftir gegn St. Mirren, ljóst er að brottrekstur Arnars átti sér nokkurn undirbúning en á sama tíma og tilkynnt var um uppsögn hans var tilkynnt um ráðningu á Srdjan Tufegdzic (Túfa).

Túfa gerði þriggja ára samning og ljóst að slíkur samningur var ekki kokkaður upp beint eftir tap í Skotlandi.

Samkvæmt því sem 433.is kemst næst var það til skoðunar hjá forráðamönnum Vals að reka Arnar úr starfi eftir tap gegn KA í undanúrslitum bikarsins á dögunum, þótti þeim frammistaðan ekki boðleg fyrir Val. Var ákveðið að bíða með uppsögnina að sjá og taka stöðuna eftir nokkra leiki. Tapið gegn Fram í Bestu deild karla á sunnudag varð svo til þess að forráðamenn Vals fóru aftur að skoða stöðuna.