Arnar Grétarsson látinn fara frá Val – Túfa tekur við

Stjórn Knattspyrnudeildar Vals hefur sagt Arnari Grétarssyni upp störfum sem þjálfara liðsins. Arnar tók við liðinu í lok árs 2022. Srdjan Tufegdzic (Túfa) tekur við og hefur skrifað undir þriggja ára samning við félagið. Haukur Páll Sigurðsson verður aðstoðarmaður Túfa.

„Þetta snýst ekki um einstaka úrslit eða leiki heldur er það einfaldlega mat okkar í stjórn að við séum ekki á réttri leið með liðið og því var þessi ákvörðun tekin. Við þökkum Adda fyrir allt það sem hann hefur gert síðan hann kom til okkar og óskum honum alls hins besta,“ segir Börkur Edvardsson formaður knattspyrnudeildar Vals.

Túfa var aðstoðarmaður Heimis Guðjónssonar þegar þeir gerðu Val að íslandsmeisturum árið 2020.

„Túfa hefur þjálfað hjá okkur áður og skilaði þá titli. Hann er frábær þjálfari og flottur karakter sem hefur haldið tengslum við félagið eftir að hann fór að þjálfa erlendis. Strákarnir hans eru í Val og hann býr hérna í hverfinu. Okkur hlakkar til að vinna aftur með Túfa sem eftir dvöl sína í flottum klúbbum erlendis kemur til baka sem enn betri þjálfari,“ segir Börkur Edvardsson.