Gylfi Þór Sigurðsson var í vikunni kynntur sem nýr aðili að Tækniþjálfun en hann og Viktor Unnar Illugason ganga til liðs við Ingólf Sigurðsson sem stofnaði fyrirtækið.

Ingólfur hefur verið með fyrirtækið undanfarið þar sem ungir krakkar koma og fá einstaklingsmiðaða þjálfun en fyrirtækið heitir nú Tækniþjálfun Gylfa Sig.

Gylfi gekk í raðir Vals í vor og hefur byrjað frábærlega í Bestu deildinni, þessi besti landsliðsmaður í sögu Íslands ætlar nú að miðla þekkingu sinni til barna hér á landi.

„Við sammælumst um að bæta við Gylfa Sig nafninu, hann á þetta alveg skilið,“ sagði Ingólfur í hlaðvarpsþættinum Dr. Football í dag.

Ingólfur segir að Gylfi vilji gera hlutina almennilega. „Hann er allur inn og vill vera á öllum æfingum sem við verðum með. Við erum mikið að ræða hvernig þetta verður sett upp, köstum á milli hugmyndum og hann er fremstur í flokki.“

Ingólfur segir að farið verði yfir alla þá hluti sem koma að tækni. „Við erum að taka allan pakkann, tækni. Þetta geta verið móttökur, knattrak, farið í gegnum skot. Það væri áhugavert fyrir krakka að fá kennslu frá Gylfa hvernig á að lúðra í boltann.“

„Það er gaman að sjá hversu mikinn áhuga hann hefur á þessu.“