Lögmaður fyrrum knattspyrnumannsins Robinho sækist nú eftir því að dómur yfir Brasilíumanninum vegna hópnauðgunar verði styttur um helming.

Robinho hóf í mars afplánun á dómi fyrir nauðgun sem hann framdi ásamt fimm öðrum mönnum á Ítalíu árið 2013. Hann situr í hinu aldræmda fangelsi Tremembe, nálægt Sao Paulo. Þar deilir hann 8 fermetra klefa með öðrum mönnum, en í fangelsinu sitja til að mynda nauðgarar og barnamorðingjar.

Robinho fékk níu ára dóm fyrir nauðgunina, en dómurinn féll árið 2017 í Ítalíu. Hann komst þó hjá því að sitja af sér þar til nú þar sem hann hélt sig í heimalandinu. Brasilísk yfirvöld samþykktu svo loks fyrr á þessu ári að láta hann sitja af sér dóminn þar í landi, en ekki er framsalssamningur á milli Ítalíu og Brasilíu.

Sem stendur þarf Robinho að sitja inni í Tremembe í þrjú ár og sjö mánuði. Má hann afplána það sem eftir stendur í opnu fangelsi. Lögmaður hans vill hins vegar að hann sitji aðeins inni í eitt ár og átta mánuði, áður en hitt úrræðið tekur við.

Notar lögmaðurinn þau rök að nauðgunin hafi ekki átt að vera skilgreind sem „hrottaleg“ og að sú skilgreining hafi orðið til þess að dómurinn varð eins þungur og raun bar vitni.

Hinn fertugi Robinho lék á ferlinum fyrir lið á borð við AC Milan, Real Madrid og Manchester City.