Bastian Schweinsteiger fyrrum miðjumaður Manchester United segir að Jose Mourinho hafi sparkað sér út úr félaginu. Þegar Mourinho tók við var Schweinsteiger bannað að koma inn í klefa liðsins.

Schweinsteiger hafði verið keyptur til United ári áður og lék undir stjórn Louis van Gaaal. Mourinho vildi hins vegar ekki hafa hann.

Schweinsteiger var seldur frá United í upphafi árs 2017 en hafði þá komið til baka og fengið örfáa bikarleiki.

„Þetta var árið 2016 og ég var með þýska landsliðinu, við fórum nokkuð langt á Evrópumótinu. Ég kom því aðeins seinna inn í undirbúningstímabilið og liðið var í æfingaferð í Bandaríkjunum,“ sagði Schweinsteiger í viðtali við Gary Neville sem var agndofa að heyra lýsingar þýska miðjumannsins.

„Á fyrsta degi var ég að æfa með Zlatan Ibrahimovic og fannst það frábært.“

„Næsta dag mæti ég á afmælisdaginn minn á æfingasvæðið. John Murtough (Yfirmaður knattspyrnumála) tók á móti mér og bannaði mér að fara inn í klefa, Mourinho hafði skipað þetta.“

„Það var enginn viðvörun, það hefði einhver getað útskýrt málið fyrir mér. Ég var sendur í klefa með U16 ára liðinu. Mér var bara sparkað út úr klefanum, ég varð að biðja Murtough að sækja fötin mín og dótið mitt.“

Schweinsteiger bað um fund með Mourinho sem hann fékk. „Ég bað um að ræða við stjórann, ég fékk fund síðdegis. Hann sagði mér að hann teldi mig ekki ánægðan í Manchester af því að endurhæfing mín hefði farið fram í Þýskalandi.“

Schweinsteiger hafði meiðst á tímabilinu á undan þegar Louis van Gaal var stjóri liðsins. „Ég var í sambandi við lækna United og horfði á leikina. Ég hafði rætt við Louis van Gaal þegar hann var þjálfari, hann vildi að ég kæmi um helgar og færi á leikina og hitti lælkna liðsins.“

„Þetta var okkar samkomulag, ég vildi bara ná heilsu og spila. Ég fór eftir öllu í okkar samkomulagi en félagið var ekki sammála.“