Paul Mullin, leikmaður Wrexham, hefur sent stuðningsmönnum liðsins skilaboð fyrir lokakafla deildarinnar.

Mullin skoraði er Wrexham vann Colchester 2-1 á útivelli um helgina en þetta var aðeins sjöundi útisigur liðsins á tímabilinu í 21 tilraun.

Stuðningsmenn Wrexham baunuðu á eigið lið í viðureigninni og vilja meina að þeir geti einfaldlega ekki unnið á útivelli – þó það hafi reynst raunin um helgina.

Mullin er ósáttur með þessa söngva en hann hefur raðað inn mörkum í vetur fyrir lið sitt sem situr í öðru sæti deildarinnar eða fjórðu efstu deild.

,,Það eina sem ég vil ekki heyra frá þeim er að við séum ekki að vinna leiki á útivelli. Hvað haldiði að það geri fyrir leikmenn sem eru að spila fyrir liðið?“ sagði Mullin.

,,Ég veit að þetta snýst aðallega um að skemmta sér og þeir eiga það skilið eftir að hafa borgað sig inn en margir af strákunum hafa engan áhuga á að heyra svona söngva.“