Sander Berge, leikmaður Burnley og norska landsliðsins, segir að Martin Ödegaard og Erling Braut Haaland séu perluvinir. Það verði hins vegar ekkert gefið eftir þegar félagslið þeirra mætast á morgun.

Manchester City með Haaland innanborðs tekur á móti Ödegaard og hans félögum í Arsenal á morgun. Um er að ræða leik sem gæti reynst afar þýðingarmikill í titilbaráttunni.

Berge, Haaland og Ödegaard eru liðsfélagara í norska landsliðinu og allir miklir vinir.

„Það er frábært að tveir af mínum nánustu vinum séu að spila risastórt hlutverk í tveimur af stærstu félögum heims,“ segir Berge.

„Eftir að Erling fór til City og Martin var hjá Arsenal fyrir veltum við því fyrir okkur hvernig þetta myndi fara þeirra á milli. Þetta var furðulegt til að byrja með því þeir voru í harðri baráttu með félagsliðum sínum gegn hvorum öðrum.

Nú eru allir vanari því að Erling sé að raða inn mörkum fyrir City og að Martin sé að skora fyrir Arsenal, þar sem hann er fyrirliði.“

Á morgun verður þó allt lagt í sölurnar.

„Þeir eru sannarlega mjög góðir vinir, eins og við allir. Þeim finnst bara gaman að spila á móti hvorum öðrum. Þeir vilja báðir vinna en þeir bera gríðarlega virðingu fyrir hvorum öðrum,“ segir Berge.