Bróðir fyrrum knattspyrnumannsins Dani Alves hefur látið í sér heyra eftir að falsfréttum var dreift um að hann hafi tekið eigið líf í fangelsi.

Alves var á dögunum dæmdur í fjögurra og hálfs árs fangelsi fyrir nauðgun á salerni skemmtistaðar í Barcelona undir lok árs 2022. Alves og fjölskylda hans halda fram sakleysi fyrrum leikmannsins.

Paulo nokkur Albuquerque skrifaði á Twitter aðgang sinn að samkvæmt hans heimildum hefði Alves tekið eigið líf í fangelsinu. Eftir mikil viðbrögð dró hann í land og sagði að hann hafi ekki verið að tala um fyrrum knattspyrnumanninn, heldur frænda sinn.

Fjölmiðlafulltrúi Alves segir að þeir íhugi að lögsækja Albuquerque og bróðir hans, Ney, hjólar í netverjann á Instagram.

„Hversu vont getur fólk verið? Það er þegar búið að dæma manninn á orði konu sem fór inn á karlaklósett til að gera það sem aðeins hann og hún vita um. Er það ekki nóg? Nú vill fólk sjá bróðir minn deyja. Hversu ljótt er þetta?“ segir hann.

Sem fyrr segir var Alves dæmdur í fjögurra og hálfs árs fangelsi á dögunum. Lögmenn hans munu áfrýja dómnum en sömuleiðis ætla ríkissaksóknari og lögmenn konunnar sækjast eftir þyngri refsingu.

Alves á tvö börn en fyrrum eiginkona hans, Joana Danz, skildi við hann eftir að málið kom upp.