Það eru engar líkur á að Vinicius Junior verði talin goðsögn í fótboltaheiminum ef hann heldur áfram að haga sér eins og ‘smábarn’ á velli.

Þetta segir goðsögnin Predrag Mijatovic sem lék með Real í þrjú ár og einnig Valencia og Fiorentina.

Mijatovic telur að Vinicius sé að pirra eigin liðsfélaga með framkomu sinni á velli en hann á það til að pirrast auðveldlega og var heppinn að fá ekki rautt spjald gegn RB Leipzig í Meistaradeildinni í vikunni.

,,Treyja Real Madrid hefur enga þolinmæði fyrir svona hegðun, kannski eitthvað annað lið en ekki Real Madrid,“ sagði Mijatovic.

,,Vinicius þarf að finna leið til að róa sig niður. Ef ekki þá verður hann aldrei talin einhver goðsögn, sama hversu góður hann er í fótbolta.“

,,Við erum að tala um óútreiknanlegan leikmann sem er góður en hann er líka óútreiknanlegur fyrir eigin liðsfélaga.“

,,Þið getið séð félaga hans draga hann burt og reyna að róa hann niður, eins og þeir séu að tala við smábarn.“