Jadon Sancho, leikmaður Dortmund á láni frá Manchester United, segir að Marco Reus hafi hvatt sig til að ganga til liðs við fyrrnefnda félagið á ný strax síðasta sumar.

Þetta segir Englendingurinn í viðtali við heimasíðu Dortmund. Hann fór aftur á láni til félagsins fyrr í þessum mánuði, en Sancho var keyptur til United frá Dortmund á 73 milljónir punda sumarið 2021.

Hann stóð ekki undir væntingum á Old Trafford og hefur átt í stríði við stjórann Erik ten Hag nær allt þetta tímabil. Var hann því lánaður burt í janúar.

Reus, sem hefur verið lengi hjá Dortmund, vildi þó greinilega fá Sancho fyrr aftur. Klippa náðist af þeim félögum eftir æfingaleik þýska liðsins gegn United í sumar. Sancho hefur nú greint frá hvað fór þeirra á milli.

„Hann sagði mér að koma aftur til Dortmund,“ segir Sancho.

„Hann sagði mér að hann yrði hér hvenær sem ég yrði klár í að koma aftur. Ég hef alltaf hugsað þannig að ef hlutirnir ganga ekki upp fyrir mig einhvers staðar er Dortmund staður sem ég þekki og allir þekkja mig. Það er gott að vita af því að félagið og leikmenn þess styðja við bakið á mér.“