Knattspyrnustjarnan Ilias Chair gæti átt yfir höfði sér tveggja ára fangelsisdóm fyrir atvik sem átti sér stað árið 2020.

Um er að ræða marokkóskan landsliðsmann sem hefur undanfarin ár spilað með Queens Park Rangers á Englandi.

Chair er ásakaður um að hafa ráðist á mann í Frakklandi fyrir fjórum árum en maðurinn ku hafa verið í sumarfríi ásamt fjölskyldu sinni.

Lögfræðingar Chair neita þessum ásökunum og segja að maðurinn hafi verið með eitt markmið og það væri að ögra stjörnunni og græða pening í kjölfarið.

Maðurinn segir að Chair hafi lamið sig í höfuðið með grjóti sem varð til þess að hann féll til jarðar og rotaðist.

Vitni hafa tekið undir það að árásin hafi átt sér stað en maðurinn hlaut alvarleg meiðsli og var fluttur á sjúkrahús.

,,Hann hefði auðveldlega getað dáið og finnur enn fyrir áverkum. Hann gat ekki sinnt sinni vinnu í langan tíma,“ kemur fram í skýrslu lögfræðinga mannsins.

Maðurinn heimtar 16 þúsund evrur í skaðabæður frá Chair sem þénar það vikulega hjá QPR.