Lionel Messi var í gær kjörinn leikmaður ársins í karlaflokki á FIFA verðlaunahátíðinni. Valið þykir umdeilt og létu margir í sér heyra, þar á meðal hér á Íslandi.

Flestir bjuggust við að Erling Braut Haaland myndi hljóta verðlaunin. Hann vann þrennuna með Manchester City í fyrra og bætti markamet ensku úrvalsdeildarinnar á einu tímabili þegar hann skoraði 36 mörk.

Messi er á mála hjá Inter Miami í Bandaríkjunum en þess má geta að HM titill hans er ekki innan tímabilsins sem kosið er um.

Það eru landsliðsþjálfarar, landsliðsfyrirliðar, íþróttafréttamenn og stuðningsmenn sem kjósa og var allt hnífjafnt en Messi vann á fleiri atkvæðum á meðal landsliðsfyrirliða.

„Þá er þessari vinsældarkosningu formlega lokið í síðasta sinn. Frakklandsmeistari og leikir með Inter Miami tryggja Messi titilinn. Þreytt að hafa unnið stóru þrennuna og bæta markametið í PL en þurfa að víkja einfaldlega fyrir meðvirkni. HM er ekki inn í þessu vali notabene,“ skrifaði Ríkharð Óskar Guðnason á X (áður Twitter) í gærkvöldi.

Elvar Geir Magnússon, ritstjóri Fótbolta.net, tók í svipaðan streng.

„Messi er geitin. En að hann hafi fengið þessi verðlaun en ekki Haaland er ekkert minna en kolruglað, með fullri virðingu fyrir bandaríska deildabikarnum.“

Fleiri tóku til máls. „Þessi verðlaun eru einfaldlega kjánaleg,“ skrifaði Magnús Þór Jónsson til að mynda undir færslu Elvars.

Þá er þessari vinsældarkosningu formlega lokið í síðasta sinn. Frakklandsmeistari og leikir með Inter Miami tryggja Messi titilinn. Þreytt að hafa unnið stóru þrennuna og bæta markametið í PL en þurfa að víkja einfaldlega fyrir meðvirkni. HM er ekki inn í þessu vali notabene. https://t.co/FUtcitN2Po

— Rikki G (@RikkiGje) January 15, 2024

Messi er geitin. En að hann hafi fengið þessi verðlaun en ekki Haaland er ekkert minna en kolruglað, með fullri virðingu fyrir bandaríska deildabikarnum #fotboltinet https://t.co/Utyh2sKKC5

— Elvar Geir Magnússon (@elvargeir) January 15, 2024