Jakob Franz Pálsson er genginn í raðir Vals. Félagið staðfesti þetta fyrir skömmu en kappinn skrifar undir fjögurra ára samning.
Jakob kemur frá ítalska félaginu Venezia en hann hafði verið orðaður við KR, þar sem hann var áður.
„Jakob Franz er þannig leikmaður að þegar við sáum að það var möguleiki að fá hann vorum við ekki í neinum vafa. Hann er í grunninn bakvörður en getur leyst fleiri stöður t.d. í hjarta varnarinnar og sem djúpur á miðjunni, ekkert ósvipað því hlutverki sem Hlynur Freyr sinnti hjá okkur á síðasta tímabili. Þrátt fyrir ungan aldur er Jakob með heilt tímabil í efstu deild með KR þar sem hann spilaði frábærlega. Jakob Franz gæti orðið lykilmaður hjá okkur næstu árin,“ segir Arnar Grétarsson þjálfari Vals.
Jakob er uppalinn hjá Þór á Akureyri, á 51 leik í meistaraflokki og hefur leikið með öllum yngri landsliðum Íslands. Hann hefur verið hluti af sterku U-21 árs landsliði Íslands.
„Umhverfi hjá Val er þannig að ég trúi því að ég geti haldið áfram að bæta mig sem leikmann og þróast í rétta átt. Hérna eru gæða leikmenn í öllum stöðum bæði inni á vellinum og í þjálfarateyminu,“ segir Jakob
