Það var mikill hiti í úrslitaleik í Íslandsmótinu í fútsal innanhúss fótbolta í gær. Ísbjörninn og sameiginlegt lið Aftureldingar, Hvíta Riddarans og Álafoss léku til úrslita í Safamýri.
Ísbjörninn stóð uppi sem sigurvegari og er Íslandsmeistari þriðja árið í röð. Atvik undir lok fyrri hálfleiks í gær hefur hins vegar verið á milli tannanna á fólki.
Leikmönnum lenti þá saman og mættu menn af varamannabekk beggja liða inn á völlinn, eins og fjallað er um á vef RÚV. Þjálfari Ísbjarnarins, Denis Grbic, féll að lokum með leikrænum tilburðum við mikinn pirring andstæðinganna.
„Hann kastar sér bara niður og ætlar að reyna að fiska eitthvað. Hann nær því í smá stund en dómararnir eru sem betur fer þrír og þeir sneru þessu bara við og sáu að sér, að þetta var bara eitthvað bull og leikaraskapur,“ segir Alexander Aron Davorsson, leikmaður Mosfellinga, við RÚV eftir leik.
Korter tók að klára síðustu sjö sekúndur fyrri hálfleiks vegna uppþotsins, en myndband af þessu er hér að neðan.
Það gekk á ýmsu í úrslitaleik Íslandsmótsins í fútsal innanhússfótbolta í dag⚽️
Nánar hér👀👇https://t.co/yfJyxjzmgk pic.twitter.com/UtCcXol8Ir— RÚV Íþróttir (@ruvithrottir) January 7, 2024
