Áramótaþáttur Íþróttavikunnar var af dýrari gerðinni þetta árið, Kristján Óli Sigurðsson og Hörður Snævar Jónsson mættu sem gestir í þáttinn sem Helgi Fannar Sigurðsson og Hrafnkell Freyr Ágústsson hafa stýrt í vetur.

Í þættinum voru veitt hin ýmsu verðlaun og þá var farið yfir allt það helsta úr íþróttalífinu hér á landi sem og erlendis.

Hægt er að hlusta á hlaðvarpið í heild sinni hér :

Arnar Grétarsson átti ágætt fyrsta tímabil með Val en menn í þættinum telja að pressan verði nokkur á næsta ári.

„Bætingin frá síðasta ári er mælanleg, vonbrigðin voru bikarinn. Tapið gegn Grindavík og þar snerist allt þann dag um fimmta leikinn í körfunni. Aron Jó, Adam Páls og þessir vitleysingar í Val voru allir búnir að panta sér sæti á gólfinu og voru að pæla í fötunum sem þeir ætluðu að vera í. Fókusinn var ekki á réttum stað,“ sagði Hörður.

Kristján segir að stigasöfnun Vals hafi verið góð. „Stigasöfnunin hjá Val þá dugar það yfirleitt til þess að vinna deildina, þetta var fín innkoma hjá Arnari. Næsta skref, það er krafa á næstu leiktíð. Þeir voru aldrei í baráttu þetta sumarið.“

Hrafnkell telur að Arnar sé á réttri leið. „Mér fannst Valur þurfa að yngja upp, mér finnst Arnar hafa gert það vel. Það eru flottir strákar að koma inn eins og Bjarni Guðjón.“

Umræðan er í heild hér að ofan.