Sævar, sem er 23 ára gamall, er á sínu þriðja tímabili hjá Lyngby, þar sem hann leikur undir stjórn Freys Alexanderssonar. Hann kom til liðsins þegar það var í B-deild og hefur verið hluti af miklum uppgangi.
„Ég er rosalega sáttur. Þetta tímabil hefur byrjað ótrúlega vel hjá liðinu. Ég hef verið að spila aðeins öðruvísi stöðu, ég er orðinn miðjumaður og er að vinna mikið fyrir liðið,“ sagði Sævar við 433.is úti í Lyngby fyrir helgi.
Eftir að hafa haldið sér uppi í dönsku úrvalsdeildinni á ótrúlegan hátt sem nýliði á síðustu leiktíð er Lyngby nú í sjöunda sæti af tólf liðum eftir níu leiki á þessari leiktíð.
„Það er mikill uppgangur í Lyngby og við ætlum að gera allt sem við getum til að komast í topp sex, þó markmið Lyngby sé alltaf bara að halda sér uppi fyrst og fremst. En við erum með það gott liðið, það góðan æfingakúltur og erum búnir að spila lengi saman margir svo við ætlum að gera allt sem við getum til að stríða þessum efstu liðum.“
Sævar vill fara að bæta mörkum við sinn leik á ný en hann á eftir að skora á þessari leiktíð.
„Ég þarf að fara að skora mörk aftur. Ég hef ekki verið að koma mér í nógu góð færi svo ég þarf að kíkja aðeins á það. En ég get ekki verið að kvarta þegar liðinu gengur svona vel. En ef við náum topp sex og ég er með núll mörk og núll stoðsendingar er mér alveg sama.“
Ítarlegt viðtal við Sævar má nálgast í spilaranum.
