Það er ljóst að Arnar Gunnlaugsson fer ekki í bann fyrir viðtal sitt eftir leik Víkings gegn Breiðabliki fyrir viku síðan. Sitt sýnist hverjum um það.

Liðin mættust í Bestu deild karla og fór leikurinn 2-2. Víkingur missti niður tveggja marka forystu og var mikill hiti eftir leik. Þá lét Arna dómara leiksins, Ívar Orra Kristjánsson, heyra það í viðtali sem hefur verið á allra vörum.

Margir veltu því upp hvort KSÍ tæki málið upp og dæmdi Arnar í bann. Svo verður ekki. Málið var rætt í Þungavigtinni.

„Við dýrkum Arnar Gunnlaugsson en við þurfum að þora að spyrja gagnrýninna spurninga. Er verið að opna flóðgátt fyrir þjálfara að urða yfir dómara og sleppa með það?“ spurði Ríkharð Óskar Guðnason.

Kristján Óli Sigurðsson tók til máls.

„Ef nafni hans Grétarsson hefði sagt þetta á Hlíðarenda eftir einhvern leik sem Valur tapaði stigum í væri sennilega búið að járna hann og fara með hann niður á hverfisgötu. Þaðan lægi leiðin á Litla-Hraun. Ég er nokkuð viss um það.“

Mikael Nikulásson segir viðtal eins og við Arnar sleppa en menn þyrftu að passa sig að ganga ekki enn lengra.

„Núna vita þeir að þeir mega ganga svona langt. En ekki vera að vaða í manninn og fjölskylduna hans.“