Guðmundur Benediktsson, íþróttafréttamaður lét ekki veiða sig út í það að ræða son sinn Albert Guðmundsson í viðtali á Bylgjunni í gær. Rætt var um fyrsta landsliðshóp Age Hareide. Liðið mætir Slóvakíu og Portúgal í undankeppni EM á næstunni.

Albert Guðmundsson, sonur Gumma Ben er mættur aftur í landsliðið eftir árs fjarveru. Hafði hann eldað grátt silfur við Arnar Þór Viðarsson fyrrum landsliðsþjálfara og ekki verið valinn og ekki viljað mæta vegna þess.

Guðmundur var spurður að því hvort hann væri ekki ánægður með það hvernig Hareide talaði um Albert en lét ekki plata sig út í það.

„Mér finnst þjálfarinn fyrst og fremst þaulvanur að sitja blaðamannafundi og hefur setið þá nokkra í gegnum tíðina, svör hans bera þess merki. Hann svarar því sem hann vill svara og gerir það vel,“ segir Gummi Ben á Bylgjunni.

„Mér líst alltaf vel á íslenska landsliðshópinn, ég er mjög spenntur að sjá Kristian Hlynsson sem kemur í fyrsta skipti inn. Willum Þór Willumsson sem hefur ekki verið í myndinni undanfarin misseri og hann kemur inn, hann hefur spilað mjög vel í Hollandi.“

Hann segir blönduna góða og fagnar endurkomu eldri leikmanna. „Svo eru menn með reynslu, Aron Einar, Jói Berg, Alfreð Finnbogason, Sverrir Ingi, Birkir Bjarnason. Ég held að þetta sé góð blanda,“ sagði Guðmundur.

Hann var að endingu spurður út í Gylfa Þór Sigurðsson sem íhugar endurkomu í fótbolta eftir um tveggja ára fjarveru.

„Ég hef fulla trú á því að Gylfi spili knattspyrnu aftur, það er erfitt að segja hvenær. Ég held að Gylfi sé að fara í gegnum tímabil, hann er að hugsa um sjálfan sig eins og hann hafi verið meiddur. Hann er að byggja sig upp þangað til að hann er klár í að æfa og spila fótbolta með liði,“ segir Gummi Ben.

„Það tekur tíma að koma til baka eftir meiðsli, þrátt fyrir að þetta hafi ekki verið meiðsli þá tekur það tíma. Hann einn getur svarað fyrir það hvenær. Það er enginn hætta á öðru að Gylfi Þór eigi sæti í landsliðinu um leið og hann spilar aftur, þá er hann fyrsti valkostur hjá þjálfaranum.“