Åge Hareide, þjálfari íslenska karlalandsliðsins, kynnti í dag sinn fyrsta landsliðshóp frá því hann tók við starfinu í vor. Norðmaðurinn ræddi svo við 433.is í höfuðstöðvum KSÍ í Laugardalnum.
Ísland tekur á móti Slóvakíu og Portúgal síðar í mánuðinum í afar mikilvægum leikjum í undankeppni EM 2024.
Hareide var meðal annars spurður út í það hvort einhverjir leikmenn úr Bestu deild karla hefðu getað fengið kallið fyrir komandi leiki eða væru nálægt landsliðshópnum.
„Það eru nokkrir leikmenn (í Bestu deildinni) sem gætu komist í liðið,“ sagði Hareide.
Hann segir svo að það gæti hentað enn betur að fá þá inn í landsliðsverkefnin í haust.
„Þetta er eins og í Noregi. Leikmenn sem spila hér heima eru betri í september og október en í mars og júní.“
Ítarlegt viðtal við Hareide má finna í spilaranum.
