Aron Einar Gunnarsson og Jóhann Berg Guðmundsson eru miðjumenn í huga Age Hareide sem valdi sinn fyrsta landsliðshóp í dag fyrir leiki gegn Slóvakíu og Portúgal í undankeppni EM.

Aron Einar hefur undanfarið oftast spilað sem miðvörður í íslenska landsliðinu.

„Svo lengi sem hann getur hreyft sig þá er hann miðjumaður, hann getur spilað báðar stöður,“ sagði Hareide á fundi í dag.

Meira;
Svona er fyrsti landsliðshópur Age Hareide: Albert snýr aftur – Kristian Nökkvi og Willum með

„Hann var mjög mikilvægur á miðjunni þegar liðið var upp á sitt besta. Ég horfi á hann sem miðjumann en hann getur leyst hina stöðuna. Hann er miðjumaður í mínum augum.“

Jóhann Berg hefur alla tíð spilað sem kantmaður í landsliðinu en á síðasta tímabili með Burnley lék hann mest á miðsvæðinu.

„Hann er miðjumaður,“ sagði Hareide þegar hann var spurður út í Jóhann Berg en gera má ráð fyrir því að bæði hann og Aron byrji á miðsvæðinu gegn Slóvakíu þann 17 júní.