Íþróttavikan kemur út alla föstudaga hér á 433.is og í Sjónvarpi Símans. Þar fá þeir Helgi Fannar Sigurðsson og Hrafnkell Freyr Ágústsson til sín góða gesti í hverri viku og ræða það helsta úr heimi íþrótta. Að þessu sinni sat Viðar Örn Kjartansson með þeim.
Kjartan Henry Finnbogason hefur mikið verið í umræðunni frá því hann var dæmdur í eins leiks bann af Aga- og úrskurðarnefnd KSÍ fyrir olnbogaskot. Félag hans FH, sem og Kjartan sjálfur, hafa gagnrýnd vinnubrögð Klöru Bjartmarz í málinu, en hún vísaði brotinu til aganefndar.
„Ég ætla ekkert að efast um upplifun hans. Ég sá á honum að hann meinti þetta og honum fannst illa að sér vegið,“ segir Hrafnkell, sem sat með Kjartani í hlaðvarpsþættinum Dr. Football þegar hann fór yfir málið.
Viðar segir að nú þurfi fleiri mál að rata á borð aganefndar.
„Mér finnst að ef þau setja standardinn þarna þá þurfa þau að vera grimmari í þessu og taka hverja umferð fyrir sig.“
FH vill meina að fjölmiðla- og samfélagsumræða um Kjartan spili inn í og tekur Viðar undir það.
„Það er alltaf þannig. Það er bara þannig í fótbolta úti um allan heim.“
Helgi tók til máls. „Ég spyr mig, af því þetta er einn leikur í bann, er það þess virði fyrir FH að vera að ýfa upp sár og eitthvað stríð við KSÍ fyrir einn leik?
Atli Viðar Björnsson nennti ekki einu sinni að bakka þá upp,“ sagði hann en Atli gagnrýndi fyrrum félaga á Stöð 2 Sport á dögunum fyrir yfirlýsingu vegna máls Kjartans.
Umræðan í heild er í spilaranum.