Daníel Ingi Jóhannesson, 16 ára gamall leikmaður ÍA, er á leið til Nordsjælland í sumar. Jón Þór Hauksson, þjálfari Skagamanna samgleðst með leikmanninum og er spenntur fyrir því að fylgjast með honum.
Daníel er gríðarlega efnilegur og hefur þegar komið við sögu með ÍA í Lengjudeildinni í sumar. Hann er bróðir Ísaks Bergmann Jóhannessonar, sem er á mála hjá FC Kaupmannahöfn, en faðir þeirra er Jóhannes Karl Guðjónsson. Daníel er miðjumaður líkt og faðir sinn og bróðir.
„Ég reikna með að hann fari einhvern tímann í júlí,“ segir Jón Þór í hlaðvarpi 433.is um Lengjudeildina.
„Þetta er mikið gleðiefni fyrir okkur. Auðvitað eigum við eftir að sakna Daníels úr okkar hópi og liði. Þetta er frábær drengur sem hefur stigið stór skref hjá okkur og verið frábært að fylgjast með honum í sinni þróun. Hann hefur þroskast mikið á stuttum tíma og staðið sig feykilega vel í vetur og mun gera í sumar.“