Breska blaðið Telegraph fjallar um stefnu Arsenal í samningamálum leikmanna í áhugaverðri grein.
Stærsta stjarna Arsenal, Bukayo Saka, krotaði undir nýjan samning við félagið í gær, en samningurinn sem áður var í gildi átti að renna út eftir ár.
Þá hafa þeir Gabriel Martinelli og Aaron Ramsdale, lykilmenn Arsenal, skrifað undir nýja samninga nýlega.
Vonir standa einnig til um að William Saliba og Martin Ödegaard skrifi undir nýja samninga á Emirates.
Arsenal er með yngsta lið ensku úrvalsdeildarinnar en leiddi kapphlaupið um Englandsmeistaratitilinn lengi vel á leiktíðinni, áður en Manchester City skaust fram fyrir þá í restina. Það á greinilega að reyna á titilbaráttuna aftur og tryggja það að bestu leikmenn verði áfram.
Í grein Telegraph er skrifað um að Arsenal sé að koma í veg fyrir að saga fortíðarinnar endurtaki sig. Á tíma Arsene Wenger fóru lykilmenn nefnilega reglulega frá félaginu.
„Þú vissir hvað bjó í liðinu og hugsaðir: Jæja, gerum þetta saman. Svo fór hluti liðsins, stundum eftir 5-6 ára vinnu. Það er pirrandi og þú þarft að byrja upp á nýtt,“ sagði Wenger í viðtali árið 2012.
„Að missa leikmenn eins og Van Persie, Fabregas, Nasri og Song á tveimur árum. Þarna fara svo miklir hæfileikar. Auðvitað verður maður áhyggjufullur,“ sagði Frakkinn einnig.
Það lofar þó góðu fyrir Arsenal að nú eru lykilmenn að framlengja hver á fætur öðrum.
Enski boltinn á 433 er í boði 
