Fjölmiðla- og umboðsmaðurinn Þorkell Máni Pétursson var gestur Íþróttavikunnar með Benna Bó í þetta skipti. Hann var í setti ásamt Herði Snævari Jónssyni, fréttastjóra íþróttafrétta á Torgi.
Nýjar reglur voru settar fyrir markverði í vítaspyrnum á dögunum. Þeir mega ekki sýna andstæðingi sínum vanvirðingu.
Var þetta gert vegna hegðunar Emiliano Martinez, markvarðar heimsmeistara Argentínu, á HM.
„Ég ætla að vitna í minn mann Dr. Football. Það er stefnan að gera fótboltann jafnleiðinlegan og NBA,“ segir Máni léttur.
„Þetta er mjög leiðinlegt. Við skulum átta okkur á því að sá sem er að fara að taka vítið getur líka tekið markmanninn úr sambandi, það hefur alveg gerst.
Af hverju má þetta ekki vera svona? Hvern erum við að vernda með þessu?“
Máni er allt annað en hlynntur nýjum reglum.
„Ég verð að segja að mér finnst þetta galið. Mér er alveg sama hvað menn ætla að gera í heimsfótboltanum varðandi þessa hluti en ég væri til í að Íslendingar myndu ekki gera það.“
Umræðuna má heyra hér að neðan.
