Alfreð Finnbogason, framherji íslenska landsliðsins var að vonum svekktur eftir 3-0 tap liðsins í undankeppni EM gegn Bosníu & Herzegovinu. Alfreð segir leikmenn íslenska liðsins hafa verið slegna tvívegis í byrjun en liðið þurfi nú bara að rífa sig í gang.
„Úrslitin eru náttúrulega ekki góð,“ sagði Alfreð í viðtali við Viaplay eftir leik. „Við vitum það manna best að við þurfum að gera betur ef við ætlum að fara áfram í þessari keppni. Við vorum svolítið slegnir í byrjun, þeir komast tvisvar inn í teig og skora tvö mörk, þeir voru svolítið maður á mann í teignum og það er hættuleg staða til að vera í.
Það er erfitt eftir 3-0 tap að gera þetta eitthvað fallegt en svona leikir vinnast og tapast í teigunum tvem, þeir voru skarpir í teig fram á við og við ekki nógu skarpir í okkar teig. Þetta var bara gríðarlega svekkjandi tap.“
Alfreð segir leikmenn Íslands hafa haft trú á því að snúa dæminu í seinni hálfleik í stöðunni 2-0.
„Ekk spurning, eitt mark kæmi okkur aftur inn í þetta. Mér fannst við byrja seinni hálfleikinn ágætlega án þess að skapa einhver stór færi, þeir voru að leyfa okkur að vera með boltann og við áttum í vandræðum með að komast í gegnum þá. Þeir voru mjög lokaðir á miðjum vellinum og við leituðum því út á við. Það er líka erfitt að finna þannig lausnir. Við þurfum bara að vinna í okkar málum og rífa okkur í gang.“
Hvernig er stemningin í klefanum hjá íslenska landsliðinu eftir leik?
„Hún er mjög slæm. Við komum hingað til þess að gera allt aðra hluti en við sýndum hér í kvöld, það er nokkuð ljóst því við erum keppnismenn. Það er gríðarlegt svekkelsi í hópnum, við ætluðum ekki að byrja keppnina svona en á hinn bóginn er fullt af leikjum eftir. Það á mikið eftir að gerast í þessari keppni og engin ástæða til að hengja haus. Það er bara áfram gakk og sækja þrjú stig á sunnudaginn.“
