Helgi Fannar Sigurðsson skrifar frá Munchen
Landsliðsmaðurinn Arnór Sigurðsson veit ekki hvað framtíðin ber í skauti sér eftir komandi sumar. Hann er samningsbundinn CSKA Moskvu en á mála hjá Norrköping í Svíþjóð á láni.
Arnór, sem er 23 ára gamall, gekk í raðir CSKA árið 2018 frá Norrköping en var lánaður aftur til sænska félagsins síðasta sumar.
Nýtti hann sér ákvæði FIFA sem sett var á laggirnar vegna innrásar Rússa í Úkraínu til að fara til Norrköping.
Nú eru hins vegar aðeins þrír mánuðir eftir af samningi Arnórs í Svíþjóð.
Arnór ræddi við 433.is á hóteli íslenska landsliðsins í Munchen, þar sem það undirbýr sig fyrir leik gegn Bosníu í undankeppni EM á morgun. Þar var hann meðal annars spurður út í framtíðina í félagsliðaboltanum.
„Það verður að koma í ljós. Ég held áfram að gera það sem ég get fyrir Norrköping. Hlutirnir munu skýrast þegar lánssamningurinn rennur út í júní.
Ég held áfram að einbeita mér að því að standa mig vel. Þá gerast góðir hlutir.“
En getur Arnór hugsað sér að snúa aftur til CSKA?
„Það er erfitt fyrir mig að svara því þar sem þetta er í raun ekki í mínum höndum.“