Manchester City gæti verið í slæmum málum eftir að enska úrvalsdeildin ákærði félagið í yfir hundrað liðum og sakar félagið um að brjóta reglur um fjármál félaga.
Rannsókn hefur staðið yfir í fjögur ár en ákærurnar voru birtar í dag. Í yfirlýsingu segir að meint brot hafi átt sér stað frá 2009 til ársins 2018.
„Félagið er grunað um að hafa ekki skilað af sér réttum upplýsingum þegar kemur að tekjum, tengdum aðilum og kostnaði,“ segir í yfirlýsingu deildarinnar.
Á þessum tíma varð City meðal annars enskur meistari í þrígang. Möguleiki er á því að félaginu verði refsað með því að stig verði tekin af því.
City er sakað um að hafa farið frjálslega með sannleikann þegar kemur að styrkarsamningum og samningum við leikmenn.
Árið 2020 dæmdi UEFA enska félagið í bann frá Meistaradeildinni fyrir brot á sömu reglum, þeim dómi var áfrýjað til íþróttadómstólsins, CAS, og látinn niður falla.
City getur hins vegar ekki áfrýjað þeirri refsingu sem það gæti átt yfir höfði sér frá ensku úrvalsdeildinni til CAS, vegna reglna deildarinnar. Það er Martyn Ziegler, blaðamaður Times, sem segir frá þessu.
City mun því ekki geta farið sömu leið og þegar dómi UEFA var áfrýjað um árið.
Man City latest: under Premier League rules the club will not be able to appeal any sanction to the Court of Arbitration for Sport (which overturned the UEFA ban)
— Martyn Ziegler (@martynziegler) February 6, 2023
Enski boltinn á 433 er í boði 
