Áramótaþáttur Íþróttavikunnar var af dýrari gerðinni þetta árið, Kristján Óli Sigurðsson og Hörður Snævar Jónsson mættu sem gestir í þáttinn sem Helgi Fannar Sigurðsson og Hrafnkell Freyr Ágústsson hafa stýrt í vetur.

Í þættinum voru veitt hin ýmsu verðlaun og þá var farið yfir allt það helsta úr íþróttalífinu hér á landi sem og erlendis.

Leikþáttur ársins þetta árið var þegar Óskar Hrafn Þorvaldsson, mætti með sína menn í Breiðabliki á rútu rétt fyrir leik í Fossvoginn. Til að fá verðlaun fyrir leikþátt ársins, þá þarf hann að vera góður.

„Mér fannst þetta skemmtilegt, ég myndi nú frekar hafa það þegar Halldór Árnason lét sig detta,“ sagði Hrafnkell Freyr og átti þar við fyrri leik liðanna í deildinni.

Kristján hafði gaman að þessu. „Þessi rútuferð, eitthvað hafa þeir haft til síns máls, Víkingar hafa verið að taka þennan klefa í gegn. Þetta var bara gaman, leikurinn var skemmtilegur.“

Hörður Snævar talaði vel um þetta. „Mikill hiti í aðdraganda leiksins, tveimur dögum fyrir leik var sagan að þeir myndu ekki mæta til leiks og svo fréttist þetta á leikdegi. Við munum sakna þess úr íslenska boltanum, 90 prósent af mestu lesnu fréttum tengdum íslenskum fótbolta voru tengdar Óskari Hrafni.“

Umræðan í heild er í spilaranum.