Alfreð Finnbogason ræddi við Stöð 2 Sport í kvöld eftir leik Íslands við Portúgal í undankeppni EM.

Ísland spilaði þéttan og fínan varnarleik í viðureigninni en Portúgal er með frábært lið og skoraði tvö mörk í 2-0 sigri.

Frammistaðan var þó mun betri en gegn Slóvakíu á dögunum þar sem Ísland fékk skell, 4-1.

,,Við getum sótt grunninn í leikjum eins og þessum og gegn Slóvakíu heima og Portúgal heima þar sem varnarvinnan er upp á tíu og við erum að verjast sem lið, það verður alltaf grunnurinn fyrir okkur,“ sagði Alfreð.

,,Við sköpum okkur alltaf færi, við þurfum að finna þetta mix og finna okkar identity og vinna í því. Við höfum ekki mikinn tíma, það er enginn leikur þar sem við erum allir saman þar til í mars.“

Alfreð var svo spurður út í ástandið í Grindavík sem er mjög slæmt en miklar skemmdir hafa orðið í bænum og er búist við eldgosi á hverri stundu. Alfreð þekkir vel til bæjarins og lék með yngri flokkum félagsins.

,,Ekki spurning, margir góðir vinir mínir búa í Grindavík eða eiga fjölskyldu í Grindavík og sama með vinafólk fjölskyldu minnar og foreldra. Maður hefur aldrei upplifað annað eins, þetta er skrítin staða þar sem allir eru að bíða eftir að eitthvað gerist. Ég sendi mínar baráttukveðjur og hugur minn er hjá fólkinu í Grindavík og ég vona að þau fái lausn á sínum málum sem fyrst.“