Age Hareide landsliðsþjálfari Íslands er ansi brattur og telur að íslenska liðið eigi mjög góðan möguleika á að fara á Evrópumótið næsta sumar. Eins og staðan er í dag fer íslenska liðið í umspil í mars.

Íslenska liðið hefur spilað ágætlega undir stjórn Hareide en farið illa með mörg færi sín og varnarleikurinn oft barnalegur.

„Það er pirrandi að horfa á leikina gegn Slóvakíu og Portúgal í sumar, þar hefðu stigin getað orðið fleiri og við værum í frábæri stöðu. Við verðum að halda áfram og horfa á það jákvæða, við höfum varist vel í sumum leikjum.

„Við vorum ekki nógu góðir fyrir framan markið gegn Lúxemborg og Bosníu heima, við spiluðum ekki vel gegn Lúxemborg úti. Við þurfum að styrkja sambönd leikmanna framarlega og aftarlega á vellinum. Mörkin munu koma.“

„Ég sá Willum skora tvö frábær mörk í Hollandi um helgina, við höfum séð Kristian Nökkva skora og Gylfa líka. Arnór Sigurðsson hefur verið að skora.“

„Þetta snýst um að halda áfram og hafa trúna, það er mikilvægast að við búum til öflugan varnarleik. Ef við endum í umspili þá þarf varnarleikurinn að vera rock solid, því við vitum að við getum skapað færi.“

Ljóst var á svörum Hareide að hann hefur hugsað málið mikið og er vongóður um að fara á Evrópumótið í Þýskalandi næsta sumar.

„Það er aðeins gegn Portúgal þar sem við skorum ekki, ef við getum orðið betri varnarlega og unnið í sóknarleiknum þá er ég vongóður um að við getum farið á Evrópumótið í mars. Eins og staðan er í dag er það Ísrael í fyrsta leik í umspili og svo yrði það Bosnía eða Finnland. Ég býð þau bara velkomin í það verkefni.“