Íþróttavikan kemur út alla föstudaga á 433.is og í Sjónvarpi Símans. Þar fá þeir Helgi Fannar Sigurðsson og Hrafnkell Freyr Ágústsson til sín góðan gest og þessa vikuna var Gunnar Birgisson, íþróttafréttamaður á RÚV, gestur.

Íslenska kvennalandsliðið mætti Dönum og Þjóðverjum í Þjóðadeildinni á dögunum og tapaði báðum leikjum, þeim fyrri 0-1 og seinni 0-2. Gunnar sér bætingu á liðinu þó þær megi verða meiri.

„Auðvitað er þetta betra en 4-0 tapið úti í Þýskalandi, þar sem liðið náði ákveðnum lágpunkti. En við megum ekki gleyma því að Þjóðverjar fá 2-3 dauðafæri á fyrstu 12 mínútunum. Það má ekkert miklu muna að þessi leikur líti allt öðruvísi út á skortöflunni,“ sagði hann í þættinum.

„Mér fannst leikurinn gegn Dönum mjög flottur að mörgu leyti. Mér fannst við sjá svolítið það sem við kölluðum eftir þar, að það sé vilji til að halda í boltann og aðeins skemmtilegra að horfa á liðið.“

Hrafnkell var ekki svo hrifinn af því sem hann sá.

„Mér fannst ekki nægilega mikið um það. Það komu kaflar á móti Dönum en ég þekki góðan mann sem ákvað að telja hvað Ísland myndi ná mörgum sendingum á milli gegn Þýskalandi. Þær náðu einu sinni sex sendingum sín á milli. Þetta var bara ekki gott spilalega séð en viljinn og baráttan var mjög flott.“

Gunnar tók til máls á ný.

„Það sem ég hef mestar áhyggjur af er að við erum að horfa á lið sem við vorum áður að pakka saman, eins og Portúgal sem spilar mjög skemmtilegan fótbolta og fór eiginlega illa með okkur í umspilinu fyrir HM, fara fram úr okkur.

Önnur lönd eru að átta sig og setja pening og fókus í þetta. Lið átta sig á að þú getur ekki bara verið með frábært karlalandslið og að kvennaliðið sé eftirbátur þess, það virkar ekki þannig lengur.“

Umræðan í heild er í spilaranum.