Paris Saint-Germain gefst ekki upp á að reyna að fá Randal Kolo Muani til liðs við sig þrátt fyrir að stóru tilboði félagsins hafi verið hafnað af Frankfurt á dögunum.

Hinn 24 ára gamli Muani er franskur landsliðsmaður sem skoraði 15 mörk í þýsku Bundesligunni á síðustu leiktíð. Hann kom til Frankfurt frá Nantes fyrir rúmu ári síðan.

Þýska félagið hafnaði tilboði PSG á dögunum upp á 70 milljónir evra auk 10 milljóna evra síðar meir.

Samkvæmt L’Equipe gefst PSG þó ekki upp og heldur áfram að reyna að landa Muani.

Það kemur einnig til greina að hann verði lánaður með kaupmöguleika eða að Hugo Ekitike fari til Frankfurt í skiptum fyrir Muani.

Muani á að baki níu A-landsleiki fyrir hönd Frakklands.