Nottingham Forest er að fá öflugan liðsstyrk frá Sevilla á Spáni.

Gonzalo Montiel er að ganga í raðir enska félagsins en hann er argentískur landsliðsbakvörður.

Forest fær Montiel á láni út þetta tímabil en getur keypt hann á 9,4 milljónir punda næsta sumar.

Montiel átti frábært síðasta tímabil þar sem hann skoraði úr vítinu sem tryggði Argentínu heimsmeistaratitilinn í Katar og gerði slíkt hið sama í úrslitaleik Evrópudeildarinnar í vor.

Hann er fimmti leikmaðurinn sem Forest fær til sín í sumar á eftir Anthony Elanga, Ola Aina, Matt Turner og Chris Wood, en sá síðarnefndi var hjá Forest á láni á síðustu leiktíð.

Á tímabilinu hingað til hefur Forest unnið einn leik og tapað einum.