Það er mikið fjaðrafok í kringum lið Njarðvíkur í Lengjudeild karla þessa stundina. Liðinu gengur illa innan vallar en vandamálin utan vallar eru í brennidepli.

Það má ætla að Arnar Hallsson þjálfari sé í fremur heitu sæti í Njarðvík en liðið hefður ekki unnið í sex leikjum í röð og er í fallsæti Lengjudeildarinnar. Þá eru mál utan vallar mikið í umræðunni.

Á dögunum sagði Arnar að Rafael Victor, leikmaður liðsins, hefði líklega spilað sinn síðasta leik fyrir Njarðvík og gagnrýndi hann hugarfar leikmannsins. Rafael var kominn aftur í byrjunarlið Njarðvíkur í tapi gegn ÍA í síðasta leik.

„Þetta er að einhverju leyti neyðarlegt. Ég held að Arnar þurfi stundum að taka leiðinlega gæjann á þetta í viðtölum, segja bara: „Við erum að skoða hans mál og sjáum svo til.“ Í staðinn fyrir að stíga fram og segja að hann sé að fara á næstunni,“ segir Hrafnkell Freyr Ágústsson í Lengjudeildarmörkunum á 433.is.

Þá er Marc McAusland, fyrirliði Njarðvíkur, sagður á förum frá félaginu vegna ósættis við Arnar.

„Hann er fyrirliði liðsins og stór karkter í fótboltanum í Njarðvík. Hann er búinn að vera þarna lengi og vel metinn, bæði sem yngri flokka þjálfari og leikmaður.

Það var ósætti sem kom upp á æfingu daginn fyrir leikinn á móti Skaganum.“

Þáttastjórnandinn Helgi Fannar Sigurðsson spurði Hrafnkel hvort hann teldi leikmenn vera að kaupa það sem Arnar reynir að selja þeim.

„Ég er á báðum áttum með það. Þetta er oft rosalegar kröfur og mikils til ætlast af mönnum sem eru kannski bara í 8-16 vinnu. Hann vill rosalega mikið. Menn fýla þetta við hann en stundum fer hann bara fram úr sér held ég.

Nú er hann búinn að búa til vesen þarna tvisvar og menn hljóta að vera að ræða málin,“ segir Hrafnkell.

Umræðan í heild er í spilaranum hér ofar og þátturinn í held hér að neðan.