Sparkspekingurinn Mikael Nikulásson segir umræðuna í kringum Breiðablik og Víking R. hafa verið á þann veg að þau væru einu lið landsins eftir leik þeirra fyrr í sumar. Hann segir það hafa komið í bakið á fyrrnefnda liðinu.

Liðin mættust í rosalegum leik á Kópavogsvelli. Lauk honum 2-2 og var mikill hiti eftir leik.

Síðan hafa Blikar dottið aftur úr í Bestu deildinni og eru 13 stigum á eftir toppliði Víkings og 5 stigum á eftir Val í öðru sætinu.

„Ég talaði um það þegar öll lætin voru eftir leik Breiðabliks og Víkings að hin liðin ættu að nýta sér það. Þessi lið og þessir stuðningsmenn tala eins og það séu tvö lið á Íslandi,“ sagði Mikael í Þungavigtinni í vikunni.

Margir vildu sjá Breiðablik og Víking mætast í úrslitaleik Mjólkurbikars karla í ár en svo verður ekki eftir tap fyrrnefnda liðsins gegn KA í undanúrslitum í vikunni. Talað var um að áhorfendamet gæti verið sett í Laugardal í úrslitaleik liðanna sem nú verður ekkert af.

„Það hefði aldrei verið sett áhorfendamet á Breiðablik-Víkingur. Það geta alveg mætt 3 þúsund manns frá Akureyri og svo er fullt af fólki í bænum sem heldur með KA. Það geta líka komið 3-4 þúsund KR-ingar á leikinn ef þeir halda áfram að vinna og KA og KR mætast í úrslitum.

Þessi lið eru búin að tala eftir þennan leik eins og þau væru tvö í þessu. Ég sagði Völsurum að nýta það og þeir hafa gert það,“ segir Mikael.

„Eftir þennan Víkingsleik finnst mér Breiðablik gjörsamlega hafa klikkað. Það verður bara að segjast eins og er og gögnin sýna það.

Menn fóru aðeins of hátt upp og það hefur komið í bakið á Blikunum.“