Erling Haaland neitar að segja frá því hvaða tölvuleik hann er að spila. Hann segir að hann skammist sín fyrir það og vilji ekki segja frá.
Haaland braut markamet ensku úrvalsdeildarinnar í gær þegar hann skoraði sitt 35 deildarmark fyrir City, er þetta hans fyrsta tímabil í deildinni.
„Þetta er sérstakt kvöld og sérstök stund,“ sagði Haaland við Sky Sports eftir leikinn gegn West Ham þar sem norska nautið skoraði eitt mark.
„Ég fer heim og spila tölvuleik, fæ mér mat og fer að sofa. Ég vakna svo og byrja að hugsa um Leeds. Þetta er lífið mitt.“
David Jones hjá Sky Sports gekk þá á Haaland og spurði hvaða leik hann spilaði. „Ég get ekki sagt það, það er of neyðarlegt.“
Jones gekk þá á Haaland og spurði hvort það væri FIFA. „Ég get ekki sagt það,“ sagði sá norski.
