Manchester United virðist ætla að gera tilraun til að fá Harry Kane til liðs við sig frá Tottenham í sumar. Félagið stefnir einnig á að hækka laun stjörnu sinnar, Marcus Rashford, og hefur sett upp áætlun til að hægt verði að gera þá tvo að launahæstu mönnum félagsins.

Í gær sagði hið virta blað Telegraph frá því að United hafi tekið fyrsta skrefið í átt að því að reyna að fá Harry Kane framherja Tottenham til félagsins í sumar.

Telegraph sagði þó að United sé mjög meðvitað um það að það geti verið ógjörningur að eiga við Daniel Levy, stjórnarformann Tottenham, sem er ansi harður í horn að taka í samningsviðræðum. Munu Rauðu djöflarnir hætta við ef of erfitt reynist að semja við Levy.

Kane á hins vegar aðeins eitt ár eftir af samningi sínum við Tottenham og félagið því ekki í mjög sterkri stöðu. Ólíklegt þykir að enski framherjinn skrifi undir nýjan samning miðað við stöðuna á Tottenham sem stendur.

Levy vill 100 milljónir punda fyrir Kane ef hann verður keyptur til félags innan Englands.

Nú segir The Sun að United hafi sett af stað áætlun um að fá Kane í sumar og einnig hækka laun Rashford. Sá síðarnefndi á aðeins ár eftir af samningi sínum á Old Trafford og hefur verið hvað besti leikmaður liðsins á tímabilinu. Vill United bjóða honum launahækkun, úr 200 þúsund pundum á viku í 300 þúsund.

Þá vill félagið geta boðið Kane sömu laun ef hann mætir. Auk þess myndu þeir báðir fá aukagreiðslur tengdar markaskorun.

Til þess að þetta gangi upp þarf að skera niður annars staðar. Sem stendur er David De Gea til að mynda launahæsti leikmaður félagsins með 375 þúsund pund á viku. Samningur hans er hins vegar að renna út.

United ætlar ekki að bjóða honum meira en 200 þúsund pund í nýjum samningi. Myndar það að einhverjum hluta pláss í bókhaldinu til að hækka laun annarra leikmanna.